غزلی تركی تقدیم به ساحت مقدس امام رضا (ع) و خواهر بزرگوارش حضرت معصومه (س)
دردِ یاره طالبم عالمده درمان عشقینه
جان متاعین چکمیشم بازاره جانان عشقینه
مور اگر سودا ایله الده توتوپ رانِ ملخ
بارگاهه یول تاپیب بیرگون سولیمان عشقینه
هئچ مقامه ساتمارام بیرگون گدالیق عالمین
بو مَقامی آلمیشام شوقیله سولطان عشقینه
من پریشان خاطیرم، مجنون سیاقی ایستیرم
داغ ، داش اولسون مسکنیم زولفِ پریشان عشقینه
جانیمی دریا قوشو ائتمیش کونول اوشدورموشام
یئتدی دریا گزمیشم ایللرجه طوفان عشقینه
غنچه دن گول لر چیخاندا ، بولبولِ دستان سرا
شوقیله مین نغمه باشلار باغ و بُستان عشقینه
میثم تمّار او گون داره گئدنده سویله دی
جانیمی بذل ایلیرم من شاهِ مردان عشقینه
اوّلین آیه گَلن گوندن رسول اکرمه
جانیندان چوخلار ال اوزدی بس کی قرآن عشقینه
بنده ی آزادیسن- آزاد- اگر گیسن بوگون
سن اسیرلر پالتارین ، سجّاد دوران عشقینه
درده گلمیش سن اگر،عبّاسی سسله ،داده گل
تشنه جان وردی ادب دریاسی جانان عشقینه
زینبا آغلار گوزومدن قان توکولسه بول روا
طاقتیم طاق اولدو چون شاهِ شهیدان عشقینه
هاردا قالمیش ضامن آهو گوررسن ای گؤزوم
آز قالیر جانیم کؤچه تک بیر «رضا جان» عشقینه
جان بولور،بیرسن بولورسن،بیرده کی تانیریم بولور
چیرپینیر قلبیم قُم ایچره روح و ریحان عشقینه
توْک رَدایِ کِبری اگنیندن «اُمیدا» گیگونن
جامه ی اُفتادگی ، شاهِ خُراسان عشقینه
سروده بنده ناچیز : علی علی زاده ( امید سلماسی)